യക്ഷി

വടിവാർന്നൊരുടലിന്നതുടമയാം യക്ഷി,

മലയിലൊരലപോലെയുലയിലെ   യക്ഷി ;

നിറമാറിൽ തറയ്ക്കുന്നിതറിയാതെൻ കൺകൾ,

വഴിപിഴയാതെ ഞാനതൊഴിവാക്കി വേഗം.

വർത്തമാനമർത്ത്യനെന്നും വാർത്തയാകും യക്ഷി,

ശോകമൂകലോകമതിന്നേകസാക്ഷി  യക്ഷി;

വിശ്രമത്തിനാശ്രയിച്ചു മിശ്രഭാവം പേറും,

ഭംഗിയുള്ളൊരംഗനക്കും  രംഗവേദിയാകും.

തന്നെയുന്നമിട്ടവർക്കു മന്നായായ യക്ഷി,

മങ്കയെന്ന ശങ്കയേതും  പങ്കിടാത്ത യക്ഷി ;

അംഗഭംഗമേറ്റിടാതെ ലിംഗഭംഗിയോടെ ,

വിചിത്രയായ് പവിത്രയായ് സുമിത്രയായ് നിൽപ്പൂ.

മത്സരത്തിന്നുത്സവത്തിൻ  വത്സലയായ് യക്ഷി,

എത്രമാത്രം ചിത്രങ്ങൾക്കു പാത്രമായി യക്ഷി ;

പണ്ടുതൊട്ടേ കണ്ടുനിൽക്കാനുണ്ടു നീണ്ടനിര,

വാക്കും നോക്കും പോക്കുമെല്ലാമാസ്വദിച്ചു നീയും.

കഷ്ടനഷ്ടബോധമിഷ്ടമായിടാത്ത യക്ഷി,

വല്ലഭനോടതുതെല്ലും മല്ലിടാതെ യക്ഷി ;

പറ്റുകില്ല മാറ്റുവാൻ ചാറ്റലിനോ കാറ്റിനോ,

വട്ടമിട്ടടുത്തിടും പക്ഷി ശ്രേഷ്ഠനൊട്ടുമേ.

കരവിരുതിൻ ചാരുതയാൽ മേരുപോൽ യക്ഷി,

മാലിനിപോൽ കല്ലോലിനിതൻ ചാരെയായ് യക്ഷി ;

തിക്കിലും തിരക്കിലും തൂക്കുപാലം കാത്തിടും,

പിച്ചവെച്ചുനീങ്ങിടുന്ന കൊച്ചിനെയുമെന്നും.

നാടുതോറും കാടുതോറുമോടിടാത്ത യക്ഷി,

തളർച്ചയോ വിളർച്ചയോ തകർക്കാത്ത യക്ഷി;

വമ്പതില്ല വീമ്പില്ല പമ്പരം കറക്കലും,

തന്ത്രവും കുതന്ത്രവും തലേണമന്ത്രമേതും.

കച്ചകെട്ടിയൊച്ചവെച്ചു നീങ്ങിടാത്ത യക്ഷി,

വൃദ്ധരായോർ ബദ്ധശ്രദ്ധം കണ്ടിടുന്ന യക്ഷി ;

കൃത്യമായി നിത്യവും ശൈത്യമുള്ള കാലവും,

മഞ്ഞതിൽ വിരിഞ്ഞു പൂത്തുലഞ്ഞു നീ നിന്നിടും.

അമാന്യതയ്ക്കതന്യമാം വന്യജീവി യക്ഷി,

ലഭ്യമായ സഭ്യതയോടഭ്യസിക്കും യക്ഷി ;

ശില്പിതന്റെ കൽപ്പനയതൽപ്പവും ചോരാതെ,

കൺകുളിർക്കെ കാണുവാനെണ്ണമറ്റവർ വരും.

ചുണ്ടനക്കി പണ്ടുമുതൽ മിണ്ടിടാത്ത യക്ഷി,

ബന്ദതിനാൽ ബന്ദിയാവാതിന്ദുമതി യക്ഷി ;

സഞ്ചിതമാം പഞ്ചലോഹ കഞ്ചുകമതില്ലാ -

തെന്തിനോ വെന്തുരുകിയിതന്തിയുറങ്ങുന്നു!

അസ്ത്രശസ്ത്രവസ്ത്രമേതുമതില്ലാതെ യക്ഷി,

വ്യക്തികൾക്കുമുക്തിയേകാൻ ശക്തിയുള്ള യക്ഷി;

ആരാമത്തിൽ രമിപ്പോർക്കൊരനുഭൂതിയാകും,

പഞ്ചമിക്കും പാഞ്ചാലിക്കും പഞ്ചാബിക്കും തോഴി.

തനതാം താനകത്തിൽ കാനായി നൂറ്റ യക്ഷി,

മണ്ണതിനും വിണ്ണതിനും കണ്ണിയാകും യക്ഷി ;

വന്നവർക്കും ചെന്നോർക്കുമൊന്നുപോൽ പ്രിയങ്കരി,

നഗ്നയായ് പഞ്ചാഗ്നിയിൽ നിമഗ്നമായിടുമ്പോൾ!

20-11-2021.